tg-me.com/awladana/77170
Last Update:
3 غلطات بنعملهم بيخلوا بناتنا ميتعودوش على الصيام😣
===================
بنتي وهي صغيرة، كان نفسها تصوم جدا، كان عندها ست سنين لما أصرت تصوم، ومكملناش صيام للظهر، وابتدت تدوخ وترجّع.. وطبعا فطرت😃..
وجربت تاني يوم، واتكررت نفس القصة.. ف ساعتها قلتلها إنها شطورة إنها حاولت، ومش هينفع تصوم بقية الشهر🙋♀️..
ومتكلمتش معاها أبدا في الموضوع ده لغاية السنة اللي بعدها..
وفي السنة اللي بعدها نفس القصة حصلت، ولا قلم زاد، ولا قلم قل😄😄..
والحقيقة إنه هي كانت صغيرة على الصيام، بس من كلامنا وفرحتنا برمضان، هي كانت عايزة تقلدنا😍..
وبردو متكلمتش معاها علشان متخافش من الصيام.. وتأثير اللي بيحصلها ده أقدر أشوف إذا كان بسبب صغر سنها وإن جسمها لسه ضعيف ولا فيه حاجة تانية🙄.. وطبعا كشفت عند الدكتور..
لغاية ما بنتي كبرت شوية، وتحملت أول يوم صيام ليها وهي تقريبا عندها 8 أو 9 سنوات.. واحتفلنا إنها لأول مرة مترجّعش وهي صايمة🎉🎉
----------
طبعا، أول يوم رمضان بيبقى عندنا مشاعر كتيرة❤️🩷🧡💛💚🤍..
فرحانين بالشهر المعظم.. ومبسوطين إن ربنا بلغنا رمضان.. وبنتمنى ربنا يعتق رقابنا🤲.. ونفسنا نعمل حاجات كتير.. وفي نفس الوقت، خايفين الوقت يسرقنا، ومنعملش العبادات صح، ومنعملش فيه أهدافنا اللي كنا ناوينها أول رمضان🙈..
وبين ده وده، عايزين نعوّد بناتنا على الصيام والصلاة على أوقاتها، وإنهم يجتهدوا في عباداتهم☑️..
اللي هقوله، ينطبق على البنات والولاد..
✅️علشان تعوّدي بنتك الصغيرة على الصيام وتخليها تحب شهر رمضان، وتتجنبي إنها تاكل من وراكي أو تكذب عليكي في الموضوع ده، عايزين نعرف إن علشان نوصل ل ده، محتاجين نعرف إن الكلام في العبادات بيحتاج طريقة كلام ليّنة وهادية علشان يتقبلوا إنهم يسمعوا من الأول..
❇️فهقولك على 3 غلطات ممكن نكون بنعملها واحنا مش قاصدين، وازاي نتجنبهم..
📌أول غلطة: إنك تقوليلها إن اللي مش هيصوم هيروح النار.. بنتك لسه صغيرة وفي مرحلة التعويد، فمتبتديش بالتخويف.. احنا من كتر حرصنا على إنهم يتعودوا على الصيام، بنوصلهم الفكرة دي.. هو الكلام صح طبعا.. ولكن طريقة الترهيب دي ممكن تأتي بنتائج عكسية تماما.. فعايزين نبتدي بالترغيب..
📌📌 تاني غلطة: إننا مبنمهدش ولا بنشرح إيه هو رمضان؟؟.. احنا ممكن ننشغل بترتيبات رمضان لوحدنا من غير ما نشركهم فيه.. كلميها إيه هو شهر رمضان أصلا.. إنه ترتيبه التاسع بين الشهور الهجرية، وإننا بنتعرف على الشهور الهجرية عن طريق الهلال.. ويا ريت توريها القمر بليل وتشرحيلها ازاي بيشوفوا الهلال أول رمضان.. كل ده علشان تعرف معلومات لطيفة تربطها بشهر الصيام💞..
قوليلها إن الصيام ركن من أركان الإسلام الخمسة.. والقرآن نزل في شهر رمضان.. وإن فيه ليلة من أعظم الليالي وفيه سورة في القرآن بإسمها، وهي ليلة القدر، واللي احنا بنستناها علشان ليلة القدر هي أفضل الليالي، وربنا أنزل فيها القرآن، وقالنا أنها خير من ألف شهر، وأنها مباركة.. فشهر رمضان مهم جدا جدا لينا.. واحنا بنستناه من السنة للسنة😍..
📌📌📌 تالت غلطة: إننا عايزينهم يصوموا علشان يتعودوا مرة واحدة، حتى لو احنا بدأنا نصوّمهم بس من الصبح للظهر، ممكن هما ميكونوش مؤهلين ل ده❌️.. مش كل الأطفال طبيعة جسمهم واحدة.. احنا عايزين نبتدي معاهم بتعويدهم مبدأ التخلي عن حاجات بسيطة في حياتنا..
يعني ممكن جدا التعويد على الصيام ميبتديش بالصيام الفعلي، لكن يبتدي بالتخلي..
◀️يعني مثلا نتخلى عن بعض احتياجاتنا من الهدوم مثلا، ونتصدق بيها..
◀️نخليهم يتخلوا عن الأكل بس في الأول، لكن ممكن يشربوا عصير وميه..
◀️نتخلى إننا نتفرج على التليفزيون في رمضان، ونعمل أنشطة بديلة..
◀️نتخلى إننا نتكلم على حد في غيابه..
✅️✅️ولما يبقوا قادرين على الصيام، يبتدوا يصوموا من العصر للمغرب، وبعدين من الظهر للمغرب، وبعدين اليوم كله..
✅️✅️مهم كمان إننا نشغلهم.. نشغلهم بأنشطة مفيدة، زي الصلصال، الرسم، التلوين، يطبخوا معانا، يعلقوا زينة رمضان..
❓️وبالنسبة للسؤال اللي بيلح عليكم، في أي سن أخلي بنتي وابني يصوموا؟؟
✴️الإجابة هي، حسب استطاعة الطفل.. لأن الصوم مفروض من سن البلوغ.. لكن احنا بندربهم ونحببهم من قبلها على أد ما تقدر..
وأهم حاجة زي ما اتفقنا قبل كده، إننا نظهر فرحتنا برمضان..
🟡قوليلي هتعودي بنتك ازاي على الصيام؟؟..
#افهميني_يا_ماما
#كيف_تربين_فتاة_واثقة
#كتاب_المذاكرة
#د_ياسمين_المهدي
#تربية_البنات #تربية #مراهقة
#parent #parenting #adolescent #parentinghacks #positivepsychology #positivity #raising_girls #raising_daughters_in_a_difficult_world #listen_connect #teen #positivepsychology #thoughts #positivethoughts #freesouls #freedom
BY أسرتي سر سعادتي
Warning: Undefined variable $i in /var/www/tg-me/post.php on line 280
Share with your friend now:
tg-me.com/awladana/77170